[ قمـوله في كشة مرهـونه ]..

القمل : قطيـعٌ يعيش في رأس الأنسان يتكاثر مع الزمان ، حين يُهمل الانسان شعر رأسه
ومايسوي شامبو ولا يفركه غاوي ، ويعشق القمل العيش في مثل هالرؤوس الي لاتعرف الاهتمام
يبني له أكواخ بين الشعيرات .. ويتجول تحت ظلال تلك الشعرات الشاهقات .. والتي تكسوها القشره أيضا
وتتخلخل أشعة الشمس بين الشعرات لدفء تلك القملات بو تعيش في رأس الانســــــــان ..
وتشتاق القملات للماء ،، والجفاف مسيطر وهي تقتلع قشرة الرأس وتمضغُها لأسكات بطنها الصُغنن
بسبب هذا الانسـان المُهمل لرأسه ،، مايقارب الماء كثير شيه .. ولا يطيقه واجد صاه ..
وتتخبأ أحيانا ، وتتسلق الشعيرات من هجوم أصابع الانسان والبحث عنها لقعصها وقتلها وابادتها





الساعة على قرب من 9 صباحاً ولا تزال مرهونه غارقةٌ في النوم ، والزبد يسيل منها و كـَ شرجه
دافعه تنساب من الوساده ، وزمجرات الشخير حاضرة بقوة .. وبالونه تصغر وتكبر ،
من نعافها وهي تتنفس ، والأم سالمة تتردد كل حين عليها لتقومها شيه من النوم ، وبسها صاه مازين الرقاد واجد

مرهونه الصغيرة تتقلب في الفراش ، واذا بحكة برأسها تجتاحُها ، وتحرك أصابعها في التحريك
والتقشيير ! .. وكأنها تجرف أرض قاحله لتهيئتها للزراعه .. وتكثر الحكات وتكثر والنفخُ يكثر
وبعدها تنهض وتجلس في الفراش ،،
واذا بتمطيقه من حلقها [يم يم يم ] وتصرط تفالها العالق بالحلق ! وتفتح نص عين وتناظر أمامها
وأشعة الشمس تتسلل بين الدريشة وتحرق عيناها بو تو فاتحتنها ، وتفرقع اصابعها قليلا ً وتسترخي

رفعت يدها مرةٌ أخـرى لرأسها وجلست تحك وتحك .. وهذي المره بقوه .. بصوت مسموع يصدر
من تصادم اظافرها بشعيرات رأسها .. ولا استبعد حدوث شرار ناتج عن هذا الحك السريع !
تضايقت من الأمــر فنشلت كشتها واخذت تحك وعاودت للحك مرةٌ اخرى صاه ،،

[ قطيع القمل الي يستوطن رأسها ]

قمول ~ يالله يالله مو ذي الهزات اليوم بو صايره ف راس ذي البنيه مالها مو تسوي
قوميله ~ ماعرف صاني بو قموله ، صا كم مره تمر علينا صبوعها وما شلتنا معها وهي تقشر
قمول ~ وهين نوبه ذيلا القماميل الصغاريه ، هين انقرعو يلعبو .. مايشوفو الاجواء متقلبه اليوم
عن تقصعهم ذي البنيه بصبوعها
قوميله ~ صاهم سارو يلعبو حيت الشعرات الي قريب ذنين البنيه ، تعرف هناك هي ماتقرب صبوعها كثير
قمول ~ صدقش صدقش .. :بو يجرع وينبش في فروة الرأس ويحك ظهره ع شعرة:

[ عودة الى مرهونه ]

مرهونه ~ ماااااااااااااااااااااااااااااااااااااه :بوتزعق من فوادها:
سالمه ~ وعوق حامل ، ها موفيش تصارخي
مرهونه ~ ماه ، راسي مطفربي من كثر ما احكه نعم ، جيبي فليت او شي احس كأنه قمل فيني
سالمه ~ انتي يبغالش ذاك بو يرشوه مال البلديه ف الحاره والدخاخين :بو تتقهقه:
مرهونه ~ ماه خلي عنش ، ما تو وقت المصخره ، مو الحل تو لاه
سالمه ~ قربي حيتي اشوف وكبسي راسش تحت وخليني افليش وابحث عن ذيلا بو مضايقينش
مرهونه ~ اشيمه ماه يالله من تمسكي حد منهم هاتي باغي اقعصه بروحي بظفوري نعم :بو تعض لسانها:

[ قطيع القمل الي يستوطن رأسها ]

قوميله ~ :بوجايه تركض وتزعق: واااابووييييه لحق لحق بو قموله ، العجوز سالمه جايه بصبوعها وتنبش ف راس ذي البنيه , اشيمه اركض بسرعه وجيب الاولاد قبل ما تشلهم

قمول ~ :بو غص بالي يمضغه وزاع: ، مووو تقولي .. :بوحط الزنوبه تحط باطه وركيض: << معقوله!!
قمول ~ حبابيني انتوه خلا قوومووو بسرعه شلو بعماركم ، الجرافه وصلت وبتجرفكم نعم خلا ولادي بسكم لعب
قموله ~ بابي بابي ، مو ذي نوبه جرافه ،
قمول ~ مافاضي حال دلعش تو :بو شالنها فوق راسه ويركض بها:

[ قمول يقترب من كوخه ، ويرى زوجه قوميله ! قد حملتها اصابع سالمة عالياً وهي تزاعق ومفصوصه ،، تم القبض عليها !! ]

سالمه ~ فتحي ايدش مرهونه جبتلش الصيد :بوتتقهقه:
مرهونه ~ يالله يالله ماماي انش بردتي فوادي ، اشيمه حطيها ع ايدي تو
سالمه ~ دوش ، بس لا تآكلها وتفكريها حبه سمسم صغنونه
مرهونه ~ ماعليش ماه تو اقعصلها راسلها وانقع رقبتها واقتلها :بوتعض لسانها:

[مرهونه تقرب أصابعها لقتل القمله التي تم القبض عليها ،
واذا بصرخه تعالت وهزت المكان << معقوله !
من قوميله المُعتقله ..]

قوميله ~ لااااااااااااااااااااااااااااااااااااااااااااااااا اااااااااااااااااااااء << مثل مال الافلام ويتردد الصدى
قمول ~ يالله يو حبتي ،، يو شحمه فوادي :بو يسمع تردد صرختها:
مرهونه ~ انصعقت قليلاً من الصرخه ولا تعرف مصدرها .. وبصبصت بعينها لتحت رأت ان القمله هي من اصدرت الصوت
قوميله ~ لاتشوفي عليّ كذاك بنص عين
مرهونه ~ خير مو فيش ؟؟
قوميله ~ ماذا ستصنعين بي ؟
مرهونه ~ مو بعد غير اني افصل راسش عن جسدك
قوميله ~ ماعرفته عن البشر أنكم لستم بهذي الشراسة لتتعدو على لحوم الغير كالحيوانات المفترسه
مرهونه ~ والبشر انواع صاه ، وانا نوع من اتضايق اقتل وبعدين انتوه مو مسويين ف راسي ها
قوميله ~ لا شيء ،، سواء نعيش في أمن وأمان بين ربوع شعراتك
مرهونه ~ وتضايقوني صاه كذاك من الصبح ؟
قوميله ~ حقيقةً الجفاف المُسيطر في رأسك هو من دفعنا للبحث عن الماء والتنبيش في فروة رأسك
نعلم انه يسبب لكِ الحك والضيق ، لكن نريد أن نعيش ،، وانتِ حارمةٌ نفسكِ من الماء لانعلم لماذا
مرهونه ~ :بوماعرفت شو ترد: برد تراه لاه .. ماغاوي السبوح كثير :كــاشخ:
قوميله ~ وموه ناويه تسوي تو فيني ؟
مرهونه ~ مثل ماخبرتش اقتلش وعقش ف الزباله
قوميله ~ عجباً لأمركم يا بني البشر سريعين ف الحكم ولاتملكون التأني ف القرار
مرهونه ~ ماااه جيبي كلينكس حبه ،
قمول ~ بو واقف عن طرف رأسها ومكبس بين الشعرات ويشوف تحت قموله ويبكي ع فراقها
مرهونه ~ :بوتتقهقه: وتحرك ظفروها للقتل وتقربها من القمله
قوميله ~ تناظر وتبتسم وتقول :
الماء يروي العطشان وهو روح الوجدان ،، ويعشقه الانسان وحتى الحيوان في البراري
ينظف الجسد ويبلله ويجعل ريحته واجد فنان ،، ويتسبح به الانسان يومياً وبالبرد لا يبالي
هنيئاً لكل جسد انبعثت روائح الطيب منه وزان ،، ويا حسره للي قدامه الماي ولا يتهم لجسده ويبالي
مرهونه ~ مو قصدش بالكلام الي قلتيه ها ،، عادي انا ما اتسبح .. مو بايه مني ها
:بو تقرب صبوها فرقبتها وتفصها:
قمول ~ :بويشوف عليها وهي تموت ومصكر عيون ولاده عشان مايشوفو ماماتهم وهي تموت:

وقصعت رأسها !!! .. وفارقت رُوحها الحياة !!!
وكفنتها بالكلينكس ، ومن الدريشه عقتها !! .. والقطيـع بأكمله في رأسها غارقٌ في الاحزان
لرحيل أحدهم الذي كان له نكهه بتواجده في ذاك الرأس

نقف هُنا .. ولا مزيد من الآلام حول قوميـله
قصصنا لكم الجزء الأول من قصص مرهونه وحياتها . .